Sunnudagur.....

Ljúf helgi á Akureyri, veðrið gott, logn og blíða.

Eftir góðan nætursvefn og göngutúrinn okkar Dalí í morgun, sest ég og skrifa nokkrar línur. Er núna að láta hangikjöt sjóða, þar sem maðurinn minn tók til í frystikistunni í gær og ákvað að þetta kjöt lægi undir skemmdum svo best væri að fara að hafa það í matinn, mér finnst það ylma ljómandi vel þar sem það mallar í pottinum og verður svo auðvitað kælt og haft í kvöldmatinn með því sem til þarf....

Var að fletta mogganum í morgun og sá þar nokkrar minningargreinar um Tómas Björnsson. Hann var sonur gamallar vinkonu minnar. Sorglegt hvernig þessi annars góði drengur endaði líf sitt. Man þau leika sér saman Huldu mína og hann þegar við bjuggum á sama stað. Þau voru eins og samlokur þó tvö ár væru á milli þeirra, Tommi litli með ljósu lokkana sína og krullurnar..alltaf glaður og brosandi, á nokkrar sætar myndir af þeim saman sem ég ætla að skanna og færa Siddu næst þegar ég fer suður.

Svona atburðir vekja mann til umhugunar um hversu fljótt skipast veður í lofti í lífi fólks.

 Fyrir liggur frágangur á þvotti og smáverk, annars bara góður dagur framundan með meiri útivist.

Já, sunnudagar eru góðir dagar til þess að hlaða batteríin og safna kröftum fyrir næstu vinnuviku og njóta þess að eiga góðar stundir með sínum nánustu.

Meira síðar. Hafið það sem best. Magga

Athugasemdir

[Vilborg Traustadóttir, 19.8.2007 kl. 23:17]

Notalegt að lesa um "mallið" fann hangiketslyktina m.a.s.  Já hvað við getum verið þakklát fyrir margt......